Föstudaginn 8. janúar útskrifuðust fyrstu þátttakendur hjá Samvinnu, starfsendurhæfingu á Suðurnesjum. Samvinna deilir þriðju hæðinni á Krossmóa 4 með MSS og mikil samvinna er milli þessara tveggja stofnanna. Tilgangur Samvinnu er að veita atvinnutengda endurhæfingu fyrir einstaklinga sem fallið hafa út af vinnumarkaði vegna sjúkdóma, slysa eða annarra áfalla. Markmiðið er að styðja þá til að stunda atvinnu á almennum vinnumarkaði eða til að takast á við nám. Miðstöð Símenntunar skipuleggur og heldur utan um námslega hluta endurhæfingarinnar í samstarfi við Fjölbrautaskóla Suðurnesja. Boðið er upp á nám á framhaldsskólastigi ýmist í formi einingarnáms eða styttri námskeiða. Þátttakendurnir sem nú eru að útskrifast eru ellefu talsins á aldrinum 24 – 64 ára af báðum kynjum. Þau hafa stundað einingabært framhaldsnám í; íslensku, ensku, stærðfræði, upplýsinga- og tölvutækni ásamt því að fá fræðslu í fjármálum, lífsleikni, sjálfsstyrkingu, nýsköpun og hreyfingu. Endurhæfingin tók átján mánuði eða þrjár annir og eina sumarönn. Á síðustu önninni fóru einstaklingarnir í starfskynningar í fyrirtækjum hér á Suðurnesjum einn dag í viku. Starfskynningarnar tókust mjög vel og segja umsagnir fyrirtækjanna meira en mörg orð.